Bible

1 羅波安堅固自家个王位以後，佢㧯以色列人民就離開上主个法律。 2 羅波安在位个第五年，上主因為佢等个悖逆責罰佢等。 3 埃及王示撒帶領一千兩百輛戰車，六萬騎兵，㧯多到算毋出个士兵，包含利比亞人、蘇基人㧯古實人个軍隊，前來攻打耶路撒冷。 4 佢佔領猶大个防衛城，逼近耶路撒冷。 5 先知示瑪雅去見羅波安王㧯猶大該兜領袖；該兜領袖因為走閃示撒全部來到耶路撒冷。示瑪雅對佢等講：「上主有話㧯你等講：『你等離開𠊎，所以這下𠊎離開你等，將你等交在示撒手中。』」 6 王㧯該兜領袖全部承認自家犯罪；佢等講：「上主所做个係公當个。」 7 上主看到佢等謙卑下來，又對示瑪雅講：「因為佢等承認自家个罪，𠊎毋毀滅佢等。總係示撒來攻打个時，佢等單淨做得保存性命定定。𠊎毋會繼續對耶路撒冷大發譴。 8 總係示撒愛征服佢等，該時佢等就會知，服事𠊎㧯服事世間个統治者有麼介分別。」 9 埃及王示撒攻入耶路撒冷，將上主个聖殿㧯王宮所有个寶物全部搶走，包含所羅門製造个金盾牌。 10 羅波安王為到補這兜金盾牌就造銅盾牌，將它兜交給看守王宮大門个守衛長管理。 11 王逐擺到聖殿去个時，守衛就拿等這兜盾牌，事後又放轉守衛室。 12 因為羅波安謙卑順從上主，上主就收轉佢个怒氣，無徹底消滅佢；猶大个情形也較安定。 13 羅波安在耶路撒冷做王，加強自家个勢力。佢做王个時四十一歲，在耶路撒冷統治十七年。耶路撒冷係上主對以色列全地選出來做敬拜佢个城。羅波安个阿姆係亞捫人拿瑪。 14 羅波安做邪惡个事，因為佢毋專心尋求上主个旨意。 15 有關羅波安一生人个事㧯佢个家譜全部記在《先知示瑪雅史》㧯《先見易多史》底背。羅波安㧯耶羅波安中間常常有戰爭。 16 羅波安死後，葬在大衛城个王室墳墓肚。佢个孻仔亞比雅承接佢做王。